बसस्थानक परिसरातील सुरक्षिततेबाबत उपाययोजनांची गरज
भद्रावती , न्यूज डेस्क✍️
भद्रावती शहरातील मध्यवर्ती बसस्थानक परिसरात सायंकाळनंतर प्रवाशांची मोठी वर्दळ होत असल्याने सुरक्षिततेच्या दृष्टीने अधिक प्रभावी उपाययोजना करण्याची आवश्यकता व्यक्त केली जात आहे. शहराच्या हृदयस्थानी असलेल्या या बसस्थानकातून दररोज महिला, विद्यार्थी, ज्येष्ठ नागरिक व कामगार मोठ्या प्रमाणात प्रवास करतात.
नागरिकांच्या म्हणण्यानुसार, सायंकाळी व रात्रीच्या वेळी बसस्थानक परिसरात अपुरी प्रकाशव्यवस्था, वाढलेली गर्दी व इतर कारणांमुळे प्रवाशांना अडचणींचा सामना करावा लागत आहे. विशेषतः महिलांसाठी सुरक्षित वातावरण अधिक सक्षम करण्याची गरज असल्याचे मत व्यक्त केले जात आहे.
भद्रावती हे चंद्रपूर जिल्ह्यातील महत्त्वाचे शहर असून नागपूर,चंद्रपूर महामार्गालगत असलेले एमएसआरटीसी बसस्थानक हे स्थानिक तसेच बाहेरील प्रवाशांचे प्रमुख केंद्र आहे. सकाळ व सायंकाळच्या वेळेत येथे मोठ्या प्रमाणात प्रवासी ये-जा करतात. त्यामुळे सुरक्षेच्या दृष्टीने प्रतिबंधात्मक उपाययोजना आवश्यक असल्याचे नागरिकांचे म्हणणे आहे.
या संदर्भात भाजयुमोचे प्रदेश सचिव तथा जनसेवक इम्रान खान यांनी प्रशासनाचे लक्ष वेधले आहे.
ते म्हणाले, “भद्रावती बसस्थानक हे शहराचे महत्त्वाचे वाहतूक केंद्र आहे. येथे दररोज मोठ्या प्रमाणात महिला व प्रवासी येतात. त्यांच्या सुरक्षिततेच्या दृष्टीने नियमित पोलिस गस्त, पोलिस मदत कक्ष, सीसीटीव्ही कॅमेरे आणि पुरेशी प्रकाशव्यवस्था असणे आवश्यक आहे. या उपाययोजनांमुळे प्रवाशांना अधिक सुरक्षित वातावरण मिळू शकते.”
तसेच महिलांसाठी स्वतंत्र बस थांब्यांची व्यवस्था व सीसीटीव्ही निगराणीमुळे बसस्थानक परिसर अधिक सुव्यवस्थित व सुरक्षित होण्यास मदत होईल, असेही त्यांनी नमूद केले.
दरम्यान, स्थानिक नागरिक व व्यापाऱ्यांकडूनही बसस्थानक परिसरात कायमस्वरूपी सुरक्षात्मक उपाययोजना राबवाव्यात, अशी अपेक्षा व्यक्त होत आहे. प्रवाशांचा विश्वास वाढावा आणि बसस्थानक परिसर अधिक प्रवासीस्नेही व्हावा, यासाठी प्रशासनाने आवश्यक पावले उचलावीत, अशी मागणी केली जात आहे.
प्रशासनाकडून याबाबत सकारात्मक निर्णय घेतल्यास बसस्थानक परिसरातील व्यवस्था अधिक सक्षम होईल, असे मत नागरिकांमध्ये व्यक्त होत आहे.
