सहकाऱ्याच्या अश्रूंना दिला आधार; स्व. सचिन रामटेके यांच्या कुटुंबासाठी पत्रकार बांधवांची माणुसकी
सिंदेवाही, न्यूज डेस्क
पत्रकार फक्त बातम्या लिहित नाही, तर संकटाच्या काळात माणुसकीचीही लेखणी जपतो, याचा प्रत्यय महाराष्ट्र राज्य पत्रकार संघाने पुन्हा एकदा दिला आहे. महाराष्ट्र राज्य पत्रकार संघ, मुंबई तालुका शाखा सिंदेवाहीचे सरचिटणीस तथा पत्रकार स्व. सचिन गुरुदेव रामटेके यांच्या अकाली निधनानंतर त्यांच्या कुटुंबावर दुःखाचा डोंगर कोसळला. या वेदनादायी प्रसंगी पत्रकार संघ आणि पत्रकार बांधवांनी एकजुटीने त्यांच्या कुटुंबाच्या पाठीशी उभे राहत सहकार्याचा हात पुढे केला.
स्व. सचिन रामटेके यांनी अनेक वर्षे पत्रकारितेच्या माध्यमातून समाजातील प्रश्नांना वाचा फोडण्याचे काम केले. शांत, संयमी आणि सर्वांना आपलेसे करणारा स्वभाव ही त्यांची खरी ओळख होती. त्यांच्या अकाली जाण्याने केवळ पत्रकारिता क्षेत्राचेच नव्हे, तर एका कुटुंबाचे आधारवड हरपले. दोन चिमुकल्या मुलींच्या डोक्यावरून वडिलांचे छत्र निघून गेल्याने सर्वत्र हळहळ व्यक्त होत आहे.
ही वेदना केवळ शब्दांत व्यक्त न करता महाराष्ट्र राज्य पत्रकार संघाने कृतीतून माणुसकी जपली. पत्रकार बांधवांनी स्वयंस्फूर्तीने सहकार्य करत रामटेके कुटुंबाला आधार देण्याचा संकल्प केला. या प्रसंगी संघटनेच्या पदाधिकाऱ्यांनी, “संकटात सहकाऱ्यांच्या कुटुंबाला साथ देणे हीच खरी पत्रकारितेची आणि संघटनेची ताकद आहे,” अशी भावना व्यक्त केली.
पत्रकारितेच्या प्रवासात अनेकांच्या अडचणी जगासमोर मांडणारे स्व. सचिन रामटेके आज आपल्यात नसले, तरी त्यांच्या कुटुंबाच्या पाठीशी संपूर्ण पत्रकार परिवार ठामपणे उभा आहे. ही साथ केवळ मदतीची नसून, विश्वास, आपुलकी आणि माणुसकीची आहे, अशा भावना उपस्थित पत्रकारांनी व्यक्त केल्या.
स्व. सचिन रामटेके यांच्या स्मृतींना विनम्र अभिवादन करत, त्यांच्या कुटुंबाला भविष्यातही आवश्यक ते सहकार्य करण्याचा निर्धार महाराष्ट्र राज्य पत्रकार संघाच्या वतीने व्यक्त करण्यात आला.
