घरात साप नाही, थेट कोब्रा! भद्रावती तालुक्यातील पाटाळा गावात खळबळ..!

पाटाळा (भद्रावती तालुका) प्रतिनिधी :-
घरामध्ये विषारी सापाची पिल्ले व अंडी आढळणे ही अत्यंत गंभीर बाब मानली जाते.
भद्रावती तालुक्यातील पाटाळा गावात अशीच अंगावर शहारे आणणारी घटना घडली असून, एका घरात कोब्रा नाग या अतिविषारी सापाची ७ पिल्ले व ९ अंडी आढळून आल्याने परिसरात खळबळ उडाली आहे.
भद्रावती तालुक्यातील पाटाळा येथील रहिवासी राजू खरवडे यांच्या घरात मार्गशीर्ष महिन्यानिमित्त पूजा असल्याने घराची साफसफाई सुरू होती.
यावेळी घरातील कुलर व धान्य साठविण्यासाठी ठेवलेल्या माच (ड्रम)च्या मागील बाजूस अचानक सापाची ७ पिल्ले व ९ अंडी दिसून आली. हे दृश्य पाहताच घरातील सदस्य घाबरून गेले.
प्रसंगी घटनेनंतर घरातील सदस्यांनी तात्काळ सर्पमित्र संदीप जीवणे यांना फोन करून सापाची पिल्ले व अंड्यांचे फोटो पाठविले. फोटो पाहताच संदीप जीवणे यांनी ही पिल्ले व अंडी कोब्रा नागाची असल्याची प्राथमिक माहिती दिली तसेच पिल्लांची आई साप परिसरात असण्याची शक्यता असल्याने विशेष खबरदारी घेण्याचा सल्ला दिला.
यानंतर सर्पमित्रांच्या मार्गदर्शनाखाली अत्यंत सावधपणे दिवसभर रेस्क्यू ऑपरेशन राबवण्यात आले. सर्व ७ पिल्ले व ९ अंडी सुरक्षितपणे ताब्यात घेण्यात आली व त्यानंतर त्यांना वर्धा नदी परिसरातील नैसर्गिक अधिवासात सोडण्यात आले.
या घटनेत कोणतीही जीवितहानी न होता वेळेवर कारवाई झाल्याने मोठा अनर्थ टळला. यावेळी सर्पमित्र संदीप जीवणे यांनी नागरिकांना आवाहन केले की, घरात किंवा परिसरात साप, सापाची पिल्ले अथवा अंडी आढळल्यास घाबरून न जाता तात्काळ वन विभाग किंवा प्रशिक्षित सर्पमित्रांशी संपर्क साधावा.