नेतृत्व खंबीर… मग धंदेवाल्यांची धडधड पक्की! सचिन खेत्रेंच्या कारवाईचा धडाका
भद्रावती-पडोली पोलिसांची धडक कारवाई; १.३० किलोपेक्षा अधिक गांजा जप्त अवैध धंद्यांविरोधात ‘साहेबांचा अॅक्शन मोड’ सुरू
भद्रावती , न्यूज डेस्क
शंकर बोरघरे..
95 52 61 25 55
चंद्रपूर जिल्ह्यातील कायदा व सुव्यवस्था अबाधित ठेवण्यासोबतच अवैध धंद्यांना आळा घालण्यासाठी पोलिसांकडून कठोर कारवाई सुरू आहे. या मोहिमेत DYSP सचिन खेत्रे यांच्या खंबीर नेतृत्वाची विशेष चर्चा होत असून, त्यांच्या नेतृत्वाखाली भद्रावती परिसरात गांजा, अवैध दारू, खर्रा-तंबाखू, सट्टा आदी अवैध व्यवसायांविरोधात कारवाईचा धडाका सुरू आहे.
चंद्रपूर जिल्ह्याचे अपर पोलीस अधीक्षक यांच्या आदेशानुसार, भद्रावती पोलीस ठाण्याचे प्रभारी अधिकारी DYSP सचिन खेत्रे यांच्या नेतृत्वात व प्रत्यक्ष उपस्थितीत भद्रावती आणि पडोली पोलिसांनी संयुक्त कारवाई करत १ किलो ३०० ग्रॅमपेक्षा अधिक गांजा जप्त केला. या कारवाईमुळे अमली पदार्थांचा अवैध व्यवसाय करणाऱ्यांमध्ये खळबळ उडाली आहे.
साहेबांचा ‘ॲक्शन मोड’ ऑन!
२ सप्टेंबर २०२६ रोजी पहाटे सहा वाजल्यापासून या कारवाईला सुरुवात झाली. सचिन खेत्रे यांनी भद्रावती पोलीस ठाण्याची जबाबदारी स्वीकारल्यानंतर कायदा-सुव्यवस्था आणि अवैध धंद्यांच्या प्रश्नाकडे विशेष लक्ष दिल्याचे दिसून येत आहे.
गेल्या काही दिवसांपासून परिसरात अवैध धंद्यांविरोधात धडक कारवायांचे सत्र सुरू असल्याने संबंधितांमध्ये अस्वस्थता निर्माण झाली आहे. कुठे गांजा, कुठे अवैध दारू, कुठे खर्रा-तंबाखू तर कुठे सट्टा; त्यामुळे काहींची अवस्था “आज आपला नंबर तर नाही ना?” अशी झाल्याची शहरात चर्चा आहे.
भद्रावतीत गांजाला आळा; आता पुरवठ्याची नाळ शोधण्यावर लक्ष
भद्रावती शहरात गांजाची विक्री नियंत्रणात आल्यानंतर काही व्यक्ती पोलीस ठाण्याच्या हद्दीबाहेरून गांजा खरेदी करून तो भद्रावतीत आणत असल्याची माहिती पोलिसांना प्राप्त झाली. या माहितीची DYSP सचिन खेत्रे यांनी गांभीर्याने दखल घेतली.
त्यानुषंगाने भद्रावती पोलीस ठाण्यातील धीरज, प्रेम, योगेश, नितीन व मपोशी रागिणी यांनी गोपनीय माहितीच्या आधारे तपास सुरू केला. तपासादरम्यान गांजा विक्रीबाबत महत्त्वपूर्ण सुगावा पोलिसांच्या हाती लागला.
प्राप्त माहितीच्या आधारे सचिन खेत्रे यांच्या नेतृत्वात पुढील कारवाईचे नियोजन करण्यात आले. यासाठी पडोली पोलिसांच्या सहकार्याने संयुक्त कारवाई करण्याचे ठरविण्यात आले.
पडोलीत छापा; गांजासह पॅकिंग साहित्य जप्त
भद्रावती आणि पडोली पोलिसांच्या संयुक्त पथकाने DYSP सचिन खेत्रे यांच्या नेतृत्वात व प्रत्यक्ष उपस्थितीत भद्रावती पोलीस ठाण्याच्या हद्दीपासून सुमारे दोन किलोमीटर अंतरावर, पडोली टी-पॉईंटजवळ, चंद्रपूर-नागपूर मुख्य मार्गालगत असलेल्या एका घरावर छापा टाकला.
घराची झडती घेतली असता एका महिलेच्या ताब्यातून १३०० ग्रॅमपेक्षा अधिक गांजा आढळून आला. गांजा पॅकिंग करण्यासाठी वापरण्यात येणारे साहित्यही पोलिसांना मिळाले. पोलिसांनी गांजा व इतर मुद्देमाल ताब्यात घेतला असून, पडोली पोलीस ठाण्यात गुन्हा नोंद करण्याची प्रक्रिया आणि पुढील तपास सुरू आहे.
‘साहेब पुढे, पथक मागे… अन् धंदेवाल्यांची धावपळ!’
या कारवाईचे विशेष वैशिष्ट्य म्हणजे भद्रावती शहरात गांजाची विक्री नियंत्रणात आणल्यानंतर आता शहराबाहेरून होणाऱ्या गांजाच्या पुरवठ्यावर पोलिसांनी लक्ष केंद्रित केले आहे.
DYSP सचिन खेत्रे यांनी स्वतः कारवाईचे नेतृत्व करत पथकाला प्रत्यक्ष मार्गदर्शन केले. त्यांच्या पुढाकारामुळे भद्रावती आणि पडोली पोलिसांची संयुक्त कारवाई यशस्वी झाली.
त्यामुळे अवैध धंदेवाल्यांमध्ये सध्या एकच प्रश्न चर्चेत असल्याचे चित्र आहे…
“साहेबांचा पुढचा नंबर कोणाचा?”
खेत्रे साहेबांच्या कारवाईचे कौतुक; नागरिकांची अपेक्षा मात्र कायम
सचिन खेत्रे सर यांच्या नेतृत्वाखाली सुरू असलेल्या धडक कारवाईचे नागरिकांकडून कौतुक होत आहे. मात्र ही कारवाई केवळ एखाद्या-दोन धाडींपुरती मर्यादित न राहता अवैध धंद्यांच्या मुळापर्यंत पोहोचावी, अशी अपेक्षाही व्यक्त होत आहे.
कारण नागरिकांचा एक बोचरा सवालही आहे…
“साहेब आले आणि अवैध धंदे एकामागून एक सापडू लागले… मग आतापर्यंत हे धंदे कुठे लपले होते?”
सवाल असला तरी सध्या एक गोष्ट स्पष्ट आहे..
नेतृत्व खंबीर असेल तर कारवाईला दिशा मिळते… आणि कारवाईला दिशा मिळाली की धंदेवाल्यांची धडधड पक्की होते!
भद्रावती परिसरात कायदा-सुव्यवस्था अबाधित ठेवण्यासाठी तसेच अवैध धंद्यांना आळा घालण्यासाठी यापुढेही कठोर कारवाई सुरू राहणार असल्याचे पोलिसांनी स्पष्ट केले आहे.
“अवैध धंद्यांना थारा नाही; कारवाईचा धडाका यापुढेही सुरूच राहणार!”
सचिन खेत्रे साहेबांचा अॅक्शन मोड सुरू आहे; त्यामुळे भद्रावतीत पुढचा नंबर कोणाचा, याकडेच आता सर्वांचे लक्ष लागले आहे!
