दिवाळीच्या उत्साहात नागरिकांनी सावध राहावे; फसवणूक व चोरीपासून सतर्क राहण्याचे पोलीस उपअधीक्षक सचिन खेत्रे यांचे आवाहन!
एटीएम फसवणूक, बॅग लिफ्टिंग, चेन स्नॅचिंगसह सायबर गुन्ह्यांबाबत चंद्रपूर पोलिसांकडून जनजागृती
भद्रावती, न्यूज डेस्क
शंकर बोरघरे 95 52 61 25 55
दिवाळीचा सण आनंदात आणि उत्साहात साजरा करताना नागरिकांनी आपल्या सुरक्षिततेकडेही विशेष लक्ष द्यावे. सणासुदीच्या काळात बाजारपेठा, गर्दीची ठिकाणे, एटीएम केंद्रे तसेच सार्वजनिक ठिकाणी चोरी आणि फसवणुकीच्या घटनांची शक्यता लक्षात घेता नागरिकांनी सतर्क राहावे, असे आवाहन पोलीस उपअधीक्षक सचिन खेत्रे यांनी केले आहे.
चंद्रपूर पोलिसांच्या वतीने नागरिकांच्या सुरक्षेसाठी विशेष जनजागृती करण्यात येत असून, एटीएम फसवणूक, बॅग लिफ्टिंग, चेन स्नॅचिंग आणि सायबर फसवणूक यापासून बचाव करण्यासाठी महत्त्वाच्या सूचना देण्यात आल्या आहेत.
एटीएममधून पैसे काढताना अनोळखी व्यक्तीची मदत घेऊ नये. एटीएम कार्डवर स्किमिंग किंवा संशयास्पद उपकरण लावले आहे का, याची तपासणी करावी. आपला एटीएम पिन, ओटीपी, सीव्हीव्ही आणि बँक खात्याची माहिती कोणालाही देऊ नये. व्यवहार पूर्ण झाल्यानंतर कार्ड ब्लॉक करण्याची गरज भासल्यास तातडीने बँकेशी संपर्क साधावा.
बाजारपेठा, बसस्थानके आणि गर्दीच्या ठिकाणी जाताना बॅग, पर्स व मोबाईलची काळजी घ्यावी. मौल्यवान दागिने आणि मोठी रोकड उघडपणे घेऊन फिरणे टाळावे. दुचाकीवरून येणाऱ्या संशयित व्यक्तींपासून सावध राहावे. रस्त्यावर चालताना गळ्यातील सोनसाखळी आणि दागिन्यांकडे विशेष लक्ष द्यावे.
तसेच अनोळखी लिंकवर क्लिक करू नये. बक्षीस, ऑफर किंवा डिस्काउंटच्या नावाखाली येणाऱ्या संशयास्पद फोन आणि संदेशांवर विश्वास ठेवू नये. सोशल मीडियावर प्रवासाची किंवा घराबाहेर असल्याची माहिती उघडपणे शेअर करणे टाळावे. घराच्या सुरक्षिततेसाठी सीसीटीव्ही आणि सुरक्षा व्यवस्थेचा वापर करावा.
सायबर आर्थिक फसवणूक झाल्यास तात्काळ १९३० या हेल्पलाइन क्रमांकावर संपर्क साधावा किंवा www.cybercrime.gov.in या संकेतस्थळावर तक्रार नोंदवावी. आपत्कालीन मदतीसाठी ११२ या क्रमांकावर संपर्क साधावा.
दिवाळी हा आनंदाचा सण आहे. मात्र, नागरिकांच्या निष्काळजीपणाचा फायदा घेऊन गैरप्रकार करणाऱ्यांपासून सावध राहणे आवश्यक आहे. नागरिकांनी पोलिसांच्या सूचनांचे पालन करून स्वतःची, कुटुंबाची आणि मालमत्तेची काळजी घ्यावी व सुरक्षित दिवाळी साजरी करावी, असे आवाहन पोलीस उपअधीक्षक सचिन खेत्रे यांनी केले आहे.
