परिस्थितीशी दोन हात करत जरीन सय्यदची यशस्वी भरारी; ८६.६० टक्क्यांनी सर्वांचे लक्ष वेधले

छोट्या व्यवसायिकाच्या मुलीने दहावीत मारली बाजी; परिसरातून कौतुकाचा वर्षाव

भद्रावती, न्यूज डेस्क ✍️

Shankar Borghare 

95 25 61 25 55 

“गरिबी घरात होती… पण जिद्द मनात होती!”

हे शब्द आता भद्रावती येथील विद्यार्थिनी जरीन अल्ताफ सय्यद हिच्यासाठी तंतोतंत लागू पडत आहेत. छोटा व्यवसाय करून संसाराचा गाडा ओढणाऱ्या आई-वडिलांच्या संघर्षाला तिने आपल्या गुणवत्तेची सोन्याची किनार देत दहावी परीक्षेत तब्बल ८६.६० टक्के गुण मिळवून घवघवीत यश संपादन केले आहे.

घरची परिस्थिती साधी. रोजच्या कमाईतून घरखर्च, शिक्षणाचा खर्च, पुस्तके, फी आणि इतर जबाबदाऱ्या सांभाळताना कुटुंबाला अनेक अडचणींचा सामना करावा लागत होता. मात्र “मुलगी शिकली पाहिजे” हा निर्धार तिच्या आई-वडिलांनी कधीही डळमळू दिला नाही. स्वतःच्या गरजा बाजूला ठेवत त्यांनी मुलीच्या शिक्षणासाठी प्रत्येक क्षणी मेहनत घेतली.

आई-वडिलांचा संघर्ष जवळून पाहत झरीननेही अभ्यासात जीव ओतला. दिवस-रात्र मेहनत करत तिने दहावी परीक्षेत ४३३ गुण मिळवत आपल्या कर्तृत्वाची छाप पाडली. इंग्रजीत ८८, हिंदीत ८३, मराठीत ८६, गणितात ८५ आणि विज्ञान व तंत्रज्ञान विषयात तब्बल ९१ गुण मिळवत तिने गुणवत्तेची उंच झेप घेतली.

निकाल जाहीर होताच कुटुंबात आनंदाचे वातावरण निर्माण झाले. मुलीच्या यशामुळे आई-वडिलांच्या डोळ्यांत आनंदाश्रू तरळले. “आमच्या संघर्षाचं चीज झालं,” अशी भावनिक प्रतिक्रिया कुटुंबीयांनी व्यक्त केली.

दरम्यान, भद्रावती येथील श्री साई कॉन्व्हेंट विद्यालयाने यंदाही दहावीचा १०० टक्के निकाल लावत उज्ज्वल परंपरा कायम राखली आहे. शिक्षकांचे मार्गदर्शन, पालकांचे सहकार्य आणि विद्यार्थ्यांची जिद्द यामुळे हे यश शक्य झाल्याचे विद्यालय प्रशासनाने सांगितले.

झरीनच्या यशामुळे परिसरात तिच्यावर अभिनंदनाचा वर्षाव होत असून अनेक विद्यार्थ्यांसाठी ती प्रेरणास्थान ठरत आहे.