पपरिस्थितीशी दोन हात करत लेकीची भरारी; ८६.६० टक्क्यांनी सर्वांचे लक्ष वेधले
छोट्या व्यवसायिकाच्या मुलीने दहावीत मारली बाजी; परिसरातून कौतुकाचा वर्षाव
भद्रावती, न्यूज डेस्क ✍️
“परिस्थिती कितीही कठीण असली तरी जिद्द मोठी असेल तर यशाचा मार्ग नक्की सापडतो,” हे भद्रावती येथील विद्यार्थिनी झरीन अल्ताफ सय्यद हिने आपल्या यशातून सिद्ध करून दाखवले आहे. छोटा व्यवसाय करून संसार चालवणाऱ्या आई-वडिलांच्या संघर्षाला तिने आपल्या गुणवत्तेची सुंदर किनार देत दहावी परीक्षेत ८६.६० टक्के गुण मिळविले आहेत.
घरची आर्थिक परिस्थिती साधी. रोजचा खर्च भागवताना मुलीचं शिक्षण, पुस्तके, फी आणि इतर गरजा पूर्ण करणं हे कुटुंबासाठी मोठं आव्हान होतं. तरीही “मुलगी शिकली पाहिजे” हा निर्धार तिच्या आई-वडिलांनी कधीही सोडला नाही. छोट्या व्यवसायातून मिळणाऱ्या मर्यादित उत्पन्नात त्यांनी मुलीच्या शिक्षणासाठी सातत्याने मेहनत घेतली.
पालकांचा संघर्ष आणि त्याग पाहत झरीननेही अभ्यासात प्रचंड मेहनत घेतली. दिवस-रात्र अभ्यास करून तिने दहावी परीक्षेत ४३३ गुण मिळवत घवघवीत यश संपादन केले. इंग्रजीत ८८, हिंदीत ८३, मराठीत ८६, गणितात ८५ आणि विज्ञान व तंत्रज्ञान विषयात तब्बल ९१ गुण मिळवत तिने आपली गुणवत्ता सिद्ध केली.
निकाल जाहीर होताच कुटुंबात आनंदाचे वातावरण निर्माण झाले. मुलीच्या यशामुळे आई-वडिलांच्या डोळ्यांत आनंदाश्रू तरळले. “आमच्या कष्टाचं चीज झालं,” अशी भावनिक प्रतिक्रिया कुटुंबीयांनी व्यक्त केली.
दरम्यान, भद्रावती येथील श्री साई कॉन्व्हेंट विद्यालयाने यंदाही दहावीचा १०० टक्के निकाल लावत उज्ज्वल परंपरा कायम राखली आहे. विद्यार्थ्यांच्या यशामागे शिक्षकांचे मार्गदर्शन आणि पालकांचे सहकार्य महत्त्वाचे ठरल्याचे विद्यालय प्रशासनाने सांगितले.
झरीनच्या यशामुळे परिसरात तिचे विशेष कौतुक होत असून अनेक विद्यार्थ्यांसाठी ती प्रेरणादायी ठरत आहे.
