वरोरा पोलीस स्टेशन हद्दीत LCB ची धडक कारवाई; धारदार तलवारीसह विधिसंघर्षग्रस्त बालक ताब्यात
गोपनीय माहितीवरून हुडकी (चिनोरा) येथे छापा; अवैध शस्त्र बाळगणाऱ्यांना स्थानिक गुन्हे शाखेचा कडक इशारा
वरोरा , न्यूज डेस्क ✍️
चंद्रपूर जिल्ह्यात गुन्हेगारीवर प्रभावी नियंत्रण ठेवण्यासाठी स्थानिक गुन्हे शाखा (LCB) सातत्याने आक्रमक भूमिका घेत असून, अवैध शस्त्रे बाळगणारे, सराईत गुन्हेगार तसेच कायदा मोडणाऱ्या प्रवृत्तीविरोधात धडक कारवाया सुरू आहेत. अशाच एका नियोजनबद्ध कारवाईत वरोरा पोलीस स्टेशन हद्दीतील हुडकी (चिनोरा) येथे एका विधिसंघर्षग्रस्त बालकाकडून विनापरवाना धारदार लोखंडी तलवार जप्त करण्यात आली. या कारवाईमुळे परिसरात एकच खळबळ उडाली असून, अवैध शस्त्रे बाळगणाऱ्यांना पोलिसांनी स्पष्ट इशारा दिला आहे.
विश्वसनीय गोपनीय माहितीच्या आधारे दि. ७ जुलै २०२६ रोजी स्थानिक गुन्हे शाखा, चंद्रपूरच्या उपविभाग वरोरा पथकाने तात्काळ कारवाईची योजना आखली. माहितीची खातरजमा करून हुडकी (चिनोरा) परिसरात सापळा रचण्यात आला. संशयिताची झडती घेतली असता त्याच्या ताब्यातून एक धारदार लोखंडी तलवार आढळून आली. त्यानंतर पोलिसांनी ती ताब्यात घेत संबंधित विधिसंघर्षग्रस्त बालकाला कायदेशीर प्रक्रियेसाठी ताब्यात घेतले.
या कारवाईत जप्त करण्यात आलेल्या धारदार लोखंडी तलवारीची अंदाजे किंमत ७ रूपये इतकी असल्याचे पोलिसांनी सांगितले. या प्रकरणी वरोरा पोलीस ठाण्यात भारतीय शस्त्र अधिनियम, १९५९ मधील कलम ४ व २५ अन्वये गुन्हा दाखल करण्यात आला असून, पुढील तपास सुरू आहे.
चंद्रपूर जिल्ह्यात स्थानिक गुन्हे शाखेकडून अवैध शस्त्रे, अवैध धंदे, गुन्हेगार, फरार आरोपी तसेच समाजकंटकांविरोधात सातत्याने धडक कारवाया सुरू आहेत. गुन्हे घडण्यापूर्वीच त्यांना प्रतिबंध घालण्याच्या उद्देशाने मिळालेल्या गुप्त माहितीवर तातडीने कारवाई केली जात आहे. त्यामुळे गुन्हेगारी प्रवृत्तीच्या व्यक्तींमध्ये पोलिसांचा धाक निर्माण होत असून, कायदा व सुव्यवस्था राखण्यासाठी स्थानिक गुन्हे शाखेची भूमिका अधिक प्रभावी ठरत आहे.
पोलिसांच्या या कारवाईमुळे वरोरा परिसरात अवैध शस्त्रे बाळगणाऱ्यांना स्पष्ट संदेश मिळाला असून, कायद्याचे उल्लंघन करणाऱ्यांविरुद्ध कोणतीही तडजोड केली जाणार नसल्याचे पुन्हा एकदा स्पष्ट झाले आहे.
ही कारवाई पोलीस अधीक्षक आयुष निपोनी व अप्पर पोलीस अधीक्षक ईश्वर कातकाडे यांच्या मार्गदर्शनाखाली, स्थानिक गुन्हे शाखेचे पोलीस निरीक्षक अमोल काचोरे यांच्या नेतृत्वात सहायक पोलीस निरीक्षक बलराम झाडोकार, तसेच सर्वेश्वर बेलसरे, जयसिंग, संतोष येलपूलवार, सचिन गुरनुले, दिनेश अराडे आणि विठ्ठल काकडे यांनी सक्रिय सहभाग घेत कारवाई यशस्वी केली.
अवैध शस्त्र बाळगणाऱ्यांवर कारवाई सुरूच राहणार…LCB
जिल्ह्यात शांतता, कायदा व सुव्यवस्था अबाधित ठेवण्यासाठी स्थानिक गुन्हे शाखेकडून अशा प्रकारच्या धडक कारवाया यापुढेही सातत्याने सुरू राहणार असल्याचे पोलिसांनी स्पष्ट केले आहे. नागरिकांनी कोणत्याही संशयास्पद हालचाली, अवैध शस्त्रे किंवा गुन्हेगारीविषयी माहिती तात्काळ पोलिसांना देऊन सहकार्य करण्याचे आवाहनही करण्यात आले आहे.
