नवभारत विद्यालयाचा गौरव; भारत सलाम राज्यस्तरीय स्पर्धेसाठी पात्र

       मूल:- प्रतिनिधी

       जुबेद शेख✍️

राज्य शैक्षणिक संशोधन व प्रशिक्षण परिषद, महाराष्ट्र, पुणे यांच्या अंतर्गत दिनांक २६ डिसेंबर २०२५ रोजी जिल्हा शिक्षण व प्रशिक्षण संस्था, गडचिरोली यांच्या वतीने आयोजित नागपूर विभागीय शिक्षक पोस्टर स्पर्धेत नवभारत विद्यालय, मुल (ता. मुल, जि. चंद्रपूर) येथील भारत हरिदास सलाम यांनी उत्कृष्ट कामगिरी करत राज्यस्तरीय स्पर्धेसाठी पात्रता मिळवली आहे. ही राज्यस्तरीय स्पर्धा परभणी येथे होणार आहे.
याप्रसंगी नागपूर विभागातील विविध जिल्ह्यांतून आलेल्या शिक्षकांनी या स्पर्धेत सहभाग घेतला होता. स्पर्धेतील विषयाची मांडणी, कल्पकता आणि शैक्षणिक आशय यामुळे भारत सलाम यांचे पोस्टर परीक्षकांच्या विशेष पसंतीस उतरले.
तसेच अध्यापनासोबतच सहशालेय उपक्रम, चित्रकला, सांस्कृतिक कार्यक्रम तसेच शैक्षणिक स्पर्धांचे आयोजन करून विद्यार्थ्यांच्या सर्वांगीण विकासासाठी सातत्याने प्रयत्न करणारे शिक्षक म्हणून भारत सलाम यांची ओळख आहे. त्यांच्या या यशामुळे नवभारत विद्यालयाचा नावलौकिक वाढला असून शाळा परिसरात आनंदाचे वातावरण आहे.
या निवडीबद्दल शाळेचे मुख्याध्यापक अशोकराव झाडे, पर्यवेक्षिका सौ. वर्षा भांडारकर, ज्येष्ठ शिक्षक गुरुदास चौधरी, शिक्षकवृंद व शिक्षकेतर कर्मचाऱ्यांनी भारत सलाम यांचे अभिनंदन करून पुढील राज्यस्तरीय स्पर्धेसाठी शुभेच्छा दिल्या आहेत.