भद्रावती बसस्थानक की ‘ऑफरोडिंग ट्रॅक’?
बस पकडायला या… पण आधी चिखलातून ‘साहसी प्रवास’ करून दाखवा!
खड्डे, चिखल अन् साचलेल्या पाण्याने प्रवाशांची कसरत; भाजयुमो प्रदेश सचिव इम्रान खान यांची संतप्त मागणी
भद्रावती, न्यूज डेस्क, शंकर बोरघरे 95 52 61 25 55
भद्रावती बसस्थानकात बस पकडण्यासाठी आता फक्त तिकीट काढून भागणार नाही; चिखलातून चालण्याचा अनुभवही आवश्यक झाला आहे. पावसामुळे बसस्थानक परिसराची अक्षरशः ‘ऑफरोडिंग ट्रॅक’सारखी अवस्था झाली असून, प्रवाशांना बसपेक्षा आधी खड्डे आणि चिखल पार करण्याची कसरत करावी लागत आहे.
बसस्थानकाच्या आवारात कुठे खड्डा, कुठे चिखल तर कुठे पाणी साचलेले दिसत आहे. एसटी बस आली की प्रवाशांची धावपळ सुरू होते; मात्र बसकडे जाण्यापूर्वी “पाय कुठे ठेवायचा आणि खड्डा कुठे आहे?” याचा अंदाज घ्यावा लागत आहे.
तिकीट एसटीचे, पण अनुभव ‘चिखल सफारी’चा!
भद्रावती बसस्थानकात येणाऱ्या प्रवाशांना सध्या एक भन्नाट सुविधा मिळत असल्याची उपरोधिक चर्चा आहे
“बसचे तिकीट घ्या आणि चिखल सफारीचा अनुभव मोफत घ्या!”
ज्येष्ठ नागरिकांसाठी हा परिसर कसोटी ठरत आहे, महिलांसाठी अडथळा शर्यत आणि दुचाकीस्वारांसाठी ऑफरोड रायडिंग! पावसाळ्यात बसस्थानकाची अशी अवस्था होत असेल, तर प्रवाशांनी छत्रीसोबत गमबूट आणि ट्रॅक्टरची मानसिक तयारी करून यावी का, असा सवाल उपस्थित होत आहे.
बसेस स्मार्ट होत आहेत; बसस्थानक मात्र चिखलात!
एकीकडे एसटी महामंडळाकडून आधुनिक बसेस आणि प्रवासी सुविधांवर भर दिला जात असताना, भद्रावती बसस्थानकाच्या आवारात मात्र खड्डे आणि चिखलाचेच साम्राज्य दिसत आहे.
“बस झाली स्मार्ट… मग बसस्थानक कधी स्मार्ट होणार?” असा थेट सवाल भाजयुमोचे प्रदेश सचिव इम्रान खान यांनी उपस्थित केला आहे.
पावसाचे पाणी साचल्यामुळे रस्ता नेमका कुठे आणि खड्डा कुठे, हे ओळखणे कठीण झाले आहे. त्यामुळे वाहनचालकांनाही सावधगिरीने वाहन चालवावे लागत आहे.
इम्रान खान यांची स्पष्ट मागणी..
भद्रावती बसस्थानक परिसराची ही दुरवस्था तातडीने दूर करून संपूर्ण आवाराचे सिमेंट काँक्रिटीकरण करावे. पावसाचे पाणी साचणार नाही यासाठी योग्य नाली व पाणी निचरा व्यवस्था करावी. तसेच प्रवाशांना सुरक्षितपणे बसपर्यंत जाता यावे यासाठी परिसराचे योग्य नियोजन करावे, अशी मागणी भाजयुमोचे प्रदेश सचिव इम्रान खान यांनी केली आहे.
“भद्रावती बसस्थानकाला बसस्थानक म्हणायचे की चिखलस्थान, हे प्रशासनाने ठरवावे. प्रवाशांना बस पकडण्यासाठी रोज ‘ऑफरोडिंग’ करावी लागत असेल तर ही कसली प्रवासी सुविधा?” असा सवाल इम्रान खान यांनी केला.
आता तरी खड्डे बुजवा; नाहीतर ‘बसस्थानक सफारी’ सुरू करा!
बसस्थानक परिसराची छायाचित्रेच सद्यस्थितीची पोलखोल करत आहेत. त्यामुळे प्रशासनाने केवळ तात्पुरती डागडुजी न करता कायमस्वरूपी आणि दर्जेदार उपाययोजना करावी, अशी मागणी होत आहे.
नाहीतर भविष्यात भद्रावती बसस्थानकाच्या तिकिटावरच नवीन सुविधा छापावी लागेल..
“बस प्रवासासोबत चिखल सफारी मोफत!”
भाजयुमो प्रदेश सचिव इम्रान खान यांची मागणी
