भद्रावती- वरोरा:- नगरपरिषद निवडणुकीच्या तोंडावर राजकीय वातावरण तापले आहे.
या निवडणुकीच्या तयारीत प्रत्येक पक्षाच्या नेत्यांनी आपल्या कार्यकर्त्यांचा मोठ्या प्रमाणात वापर केला आहे.
मात्र, निवडणूक संपल्यावर या कार्यकर्त्यांना नेत्यांकडून दुर्लक्षित केले जाते, अशी खंत अनेक कार्यकर्त्यांनी व्यक्त केली आहे. निवडणूक झाल्यावर फोनसुद्धा उचलला जात नाही, असे त्यांचे म्हणणे आहे.
भद्रावती शहरातील अनेक कार्यकर्त्यांनी सांगितले की, निवडणूक यंत्रणेत त्यांच्यावर अवलंबून राहिले जाते.
रात्रंदिवस घरातून बाहेर पडून प्रचार करावा लागतो, नागरिकांच्या घरोघरी जाऊन आश्वासने द्यावी लागतात, मात्र निवडणूक झाल्यावर नेत्यांचा दृष्टिकोन बदलतो.
त्यांच्याकडे फोन केला तरी उचलला जात नाही, भेटीला बोलावले तरी वेळ नसतो, अशी तक्रार अनेकांनी केली आहे.
“आम्ही निवडणूक जिंकवण्यासाठी रात्रंदिवस मेहनत घेतली, पण निवडणूक झाल्यावर आमच्याकडे पाठ फिरवली जाते.
आमच्या समस्या ऐकण्यासाठी कोणीच नसते,” असे एका अनुभवी कार्यकर्त्याने सांगितले.
अशा वापरवादी दृष्टिकोनामुळे कार्यकर्त्यांमध्ये नाराजीचे वातावरण निर्माण झाले आहे.
अनेकांनी आगामी निवडणुकांमध्ये आपला सहभाग कमी करण्याचा निर्णय घेतला आहे.
भद्रावतीतील राजकीय विश्लेषकांच्या मते, नेत्यांचा असा वापरवादी दृष्टिकोन पाहता, आगामी निवडणुकांमध्ये पक्षांना फटका बसू शकतो.
कार्यकर्त्यांचा उत्साह कमी झाल्यास प्रचाराची शक्ती कमी होईल आणि त्याचा परिणाम निवडणूक निकालावर होऊ शकतो. त्यामुळे पक्षांनी आपल्या कार्यकर्त्यांच्या भावनांचा आदर करणे गरजेचे आहे.
चंद्रपूर जिल्ह्यातील भद्रावती, बल्लारपूर, वरोरा, ब्रह्मपुरी, घुग्घुस, राजुरा, गडचांदूर, चिमूर, मूल, नागभीड या दहा नगरपरिषद आणि भिसी नगरपंचायतीत 2 डिसेंबर 2025 रोजी मतदान होणार आहे. या निवडणुकीच्या पार्श्वभूमीवर कार्यकर्त्यांच्या नाराजीचा मुद्दा अधिक गांभीर्याने घेतला जात आहे.
भद्रावती नगरपरिषदेची स्थापना 15 ऑगस्ट 1997 रोजी झाली. त्यानंतर 1998 मध्ये झालेल्या पहिल्याच निवडणुकीत शिवसेनेचा नगराध्यक्ष नगरपरिषदेवर विराजमान झाला होता.
पुढे 2003 ते 2024 या कालावधीत शिवसेनेने नगराध्यक्षपदासह नगरपरिषदेवर भक्कम वर्चस्व राखले.
2018 च्या निवडणुकीत तत्कालीन आमदार बाळू धानोरकर यांच्या नेतृत्वात शिवसेनेचा उमेदवार विजयी झाला आणि नगराध्यक्षपदासह 16 नगरसेवक निवडून आले.
मात्र त्यानंतर 2019 च्या लोकसभा निवडणुकीदरम्यान धानोरकर यांनी काँग्रेस पक्षात प्रवेश केला आणि स्थानिक पातळीवर शिवसेनेत फूट पडून ठाकरे गट आणि शिंदे गट अशी विभागणी झाली.
या निवडणुकीच्या पार्श्वभूमीवर उमेदवारीसाठी शिवसेनेकडे मोठी गर्दी आहे.
बाहेरील पक्षांतील अनेक इच्छुक उमेदवारही शिवसेनेच्या संपर्कात आहेत. त्यामुळे अंतिम उमेदवारी कोणाच्या नावावर ठरणार याकडे सर्वांचे लक्ष लागले आहे.
याशिवाय राज्यातील 246 नगरपरिषदा आणि 42 नगरपंचायतींसाठी 2 डिसेंबर 2025 रोजी मतदान होणार आहे.
मतमोजणी 3 डिसेंबर रोजी होईल. या निवडणुकीत एकूण 1,07,03,576 मतदार आहेत. नगरपरिषदेची एकूण सदस्य संख्या कमीत कमी 20 ते 75 पर्यंत असते.
नगरपंचायतीची निवडणूक एकसदस्यीय पद्धतीने होत असली तरी नगरपंचायतीच्या मतदारानेदेखील दोन मते देणे अपेक्षित आहे.
“आम्ही निवडणूक जिंकवण्यासाठी रात्रंदिवस मेहनत घेतली, पण निवडणूक झाल्यावर आमच्याकडे पाठ फिरवली जाते. आमच्या समस्या ऐकण्यासाठी कोणीच नसते,”
मत अनुभवी कार्यकर्ता..!
“कार्यकर्त्यांचा उत्साह कमी झाल्यास प्रचाराची शक्ती कमी होईल आणि त्याचा परिणाम निवडणूक निकालावर होऊ
शकतो,”
राजकीय विश्लेषक
—
नगरपरिषद निवडणुकीच्या वातावरणात कार्यकर्त्यांच्या नाराजीचा मुद्दा गांभीर्याने घेतला जात नाही. पक्षांनी आपल्या कार्यकर्त्यांच्या भावनांचा आदर करणे गरजेचे आहे.
नाराजी वाढल्यास भविष्यातील निवडणुकीवर परिणाम होऊ शकतो.
